အခေါက် အကိုင်းဆက်နည်း

အခေါက် အကိုင်းဆက်နည်းကို အင်္ဂလိပ်ပိုင် Bark Grafting လို့ ခေါ်ပါရေ။



အဆင့် - ၁  ကိုင်းဆက်ခံဖို့ အပင်နန့် လားဆက်ဖို့ အပင်ကို ရွီးပါ

ကိုင်းဆက်ခံဖို့ အပင်နန့် လားဆက်ဖို့ အပင် နှစ်ပင်လုံးစွာ သန်သန်စွမ်းစွမ်း ဖြစ်ရပါဖို့။

ရောဂါ ဖြစ်နိန်ရေ အပင်မျိုး မဖြစ်ပါဇီကဲ့။

လားဆက်ဖို့ အပင်စွာ အကိုင်းတက် အသစ်တိ ထွက်နိန်ဗြီးသား မဖြစ်ရပါ။

လားဆက်ဖို့ အပင်က အကိုင်းသစ် ထွက်ဖို့ ဘု အတက်ချေ ၄ - ၅ တက်ပါရေ၊ ၁ ပေ အရှည် အကိုင်း ၂ ကိုင်း လိုပါရေ။

လားဆက်ဖို့ အပင်နန့် အဆက်ခံဖို့ အပင်ကို တပြိုင်တည်း မဖြတ်ပါကဲ့။

- အဆက်ခံဖို့ အပင်မှာ ဖြောင့်တန်းနိန်ပနာ မတ်မတ် ထောင်နိန်ရေ အချင်း ၁ လက်မ - ၂ လက်မ အရွယ်အစားရှိရေ အကိုင်းတိ ရှိဖို့ လိုပါရေ။

- အခေါက်အကိုင်းဆက်နည်းကို အခေါက်တိ အလွယ်တကူ ကွာတတ်တေ နွီရာသီမှာ လုပ်ကတ်စွာ များပါရေ။  

- ရိုးတံ အကိုင်းဆက်နည်း လုပ်ဖို့ ကိုင်းဆက်ခံအပင် အရွယ်အစားက ကကောင်း ကြီးလားရေဆိုခါ အခေါက်အကိုင်းဆက်နည်းကို လုပ်တတ်ကတ်ပါရေ။



အဆင့် - ၂  ကိုင်းဆက်ခံဖို့ အပင်ကို ဖြတ်ပါ

ကိုင်းဆက်ခံအပင် အကိုင်းတိထဲက မိုးကို ထောင်ပနာ ထွက်နိန်ရေ အကိုင်း တကိုင်းကို လွှ ထထက်နန့် အခေါက်နန့် အနှစ်သားကို မပွန်း မပဲ့လားအောင် ဂရုတစိုက် ဖြတ်ပါ။

ဖြတ်လိုက်တေ အကိုင်း အောက်ဖက်မှာ အပင် အသက်ဆက်ရှင်နိန်ဖို့ အနည်းဆုံး အကိုင်း တကိုင်းလောက် ချန်ထားခပါ။



အဆင့် - ၃  ကိုင်းလားဆက်ဖို့ အပင်က အကိုင်းသစ်ထွက်ဖို့ ဘု အတက်ချေ ၄ - ၅ တက်လောက် ပါရေ အကိုင်း ၂ ကိုင်းကို ဖြတ်ပါ။

အကိုင်းဖျားတိကို ကိုင်းလားဆက်ဖို့ အကိုင်း အရှည် ၅ လက်မ လောက်ဇီ ချန်ပခပနာ ထပ်ဖြတ်ပါ။

၅ လက်မ အရှည်ထဲက အောက်ဖက် ၃ လက်မကို အောက်ခြီ အဆုံးထိ စစောင်းချေ ထပ်ဖြတ်ပါ။



အဆင့် - ၄  ကိုင်းဆက်ခံဖို့ အပင်မှာ ကိုင်းလာဆက်ဖို့ အကိုင်းတိ အံဝင်ဂွင်ကျ ဖြစ်အောင် အခေါက်ကို အလျှားလိုက် ထွင်းထုတ်ပါ

အောက်ဖက် ၃ လက်မ ချချွန် လုပ်ထားရေ ကိုင်းလားဆက်ဖို့ အပိုင်းက ဘေးနခမ်းသား ( ၈ ပုံ ၁ ပုံ လက်မ ) လောက်ကို ပပါးချေ လှီးပစ်ပါ။

ကိုင်းလားဆက်ဖို့ အကိုင်းကို ကိုင်းဆက်ခံအပင်က ထွင်းထားရေ အမြှောင်းထဲမှာ ထည့်လိုက်တေခါ လှီးထားရေ အခေါက် - အခေါက်ချင်း ကပ်နိန်အောင်လို့ပါ။



အဆင့် - ၅  ကိုင်းဆက်ခံဖို့ အပင်မှာ ကိုင်းလာဆက်ဖို့ အကိုင်းတိကို ထည့်ပါ

လှီးထားရေ အခေါက်တိ နခမ်းသားချင်း တိုက်နိန်အောင် ဂရုတစိုက် ထည့်ပါ။

သေချာဗျာလ်ဆိုကေ သံမှို အငယ်ချေ ၂ ချောင်းစီ အနှစ်ဖြူသားထိ ရောက်အောင် မာတူနန့် ရိုက်ထည့်ပနာ နောင်းနိန်အောင် လုပ်ပါ။



အဆင့် - ၆  ဖြတ်ထားရေ နိန်ရာတိ အားလုံးကို ဂရုတစိုက် ပိတ်ပါ

ဖြတ်ထားလို့ အသားစတိ ပေါ်နိန်ရေ နိန်ရာတိုင်းကို ကိုင်းဆက်ဖယောင်း ( သာမန် ဖယောင်းကို ပပျော့ချေ လုပ်ထားကေ ရပါရေ ) (ဝါ) ကတ္တရာ ပပါးချေ လောင်းဗျာလ် နပူလောင်ပနာ မခြောက်လားအောင် နန့် ဘတ္တရီးယားပိုးတိ မဝင်အောင် ဂရုတစိုက် ပိတ်ပါ။

နောက်နိန့်မှာ တခါ အပေါက်တိ မပိတ်ဘဲ မကျန်ခဆိုစွာ သေချာအောင် ထပ်လားကြည့်ပါ။



အဆင့် - ၇  ကိုင်းဆက်ကို ဂရုတစိုက်ဇီ လားကြည့်ပီးပါ

ကိုင်းဆက်အောက် ကိုင်းဆက်ခံ အပင်မှာ အတက်သစ်တိ ထပ်ထွက်လာကေ ဖြတ်ပလိုက်ပါ။

ကိုင်းဆက်သစ်မှာ အတက်သစ်တိ ထွက်လာကေ အကောင်းဆုံး ၁ တက်ကို ချန်ပနာ ကျန်စွာတိကို ဖြတ်ပလိုက်ပါ။

၂ ရာသီလောက် ကြာကေတော့ခါ အကောင်းဆုံး တကိုင်းရာ ချန်ထားပနာ ကျန်ရေ အကိုင်းတိကို ခွတ်ပလိုက်ပါ။


အေလောက်ဆိုကေတော့ခါ အခေါက် အကိုင်းဆက်နည်းကို အသေအချာ နားလည်ဗျာလ် ထင်ပါယင့်။

မရှင်းစွာ ရှိကေ လှမ်းမိန်းနိုင်ပါရေ။

နောက်ဆုံး တနည်းကို ထပ် ရှင်းပြပီးပါမေ။



ကျော်ဝင်းခိုင်